551. حضرت فیروز دیلمی رضی اللہ عنہ

【1】

حضرت فیروز دیلمی رضی اللہ عنہ

حضرت فیروز (رض) سے مروی ہے کہ ان کے قبیلے کے لوگ مسلمان ہوگئے، ان میں وہ خود بھی شامل تھے، انہوں نے اپنی بیعت اور قبول اسلام کی اطلاع دینے کے لئے نبی ﷺ نے ان کی بیعت و اسلام کو قبول فرما لیا، انہوں نے عرض کیا یا رسول اللہ ! ﷺ آپ جانتے ہیں کہ ہمارا تعلق کس قبیلے سے ہے اور ہم جہاں سے آئے ہیں وہ بھی آپ کے علم میں ہے، اب ہم مسلمان ہوگئے ہیں تو ہمارا ولی کون ہے ؟ نبی ﷺ نے فرمایا اللہ اور اس کے رسول ﷺ وہ کہنے لگے کہ ہمارے لئے یہ کافی ہے اور ہم اس پر راضی ہیں۔

【2】

حضرت فیروز دیلمی رضی اللہ عنہ

حضرت فیروز (رض) سے مروی ہے کہ میں نے عرض کیا یا رسول اللہ ! آپ جانتے ہیں کہ ہمارا تلعق کس قبیلے سے ہے اور ہم جہاں سے آئے ہیں وہ بھی آپ کے علم میں ہے، اب ہم مسلمان ہوگئے ہیں تو ہمارا ولی کون ہے ؟ نبی ﷺ نے فرمایا اللہ اور اس کے رسول ﷺ ۔

【3】

حضرت فیروز دیلمی رضی اللہ عنہ

حضرت فیروز (رض) سے مروی ہے کہ نبی ﷺ نے ارشاد فرمایا ایک وقت ایسا بھی ضرور آئے گا جب اسلام کی رسی کا ایک ایک دھاگہ نکال نکال کر توڑ دیا جائے گا جیسے عام رسی کو ریزہ ریزہ کردیا جاتا ہے۔

【4】

حضرت فیروز دیلمی رضی اللہ عنہ

ضحاک بن فیروز کہتے ہیں کہ ان کے والد فیروز (رض) نے جب اسلام قبول کیا تو ان کے نکاح میں دو بہنیں تھیں، نبی ﷺ نے ان سے فرمایا کہ ان میں سے کسی ایک کو جسے تم چاہو طلاق دے دو ۔ ضحاک بن فیروز (رض) کہتے ہیں کہ ان کے والد نے اسلام کا زمانہ پایا ہے۔

【5】

حضرت فیروز دیلمی رضی اللہ عنہ

حضرت فیروز (رض) سے مروی ہے کہ میں نے جب اسلام قبول کیا تو میرے نکاح میں دو بہنیں تھیں، نبی ﷺ نے مجھ سے فرمایا کہ ان میں سے کسی ایک کو جسے تم چاہو طلاق دے دو ۔

【6】

حضرت فیروز دیلمی رضی اللہ عنہ

حضرت فیروز (رض) سے مروی ہے کہ ایک مرتبہ میں نبی ﷺ کی خدمت میں حاضر ہوا اور عرض کیا یا رسول اللہ ! ﷺ ہم لوگ انگوروں والے ہیں، اب شراب کی حرمت کا حکم نازل ہوگیا ہے، لہذا ہم اپنے انگوروں کا کیا کریں ؟ نبی ﷺ نے فرمایا تم اس کی کشمش بنا لو، میں نے عرض کیا کہ ہم کشمش کا کیا کریں گے ؟ نبی ﷺ نے فرمایا صبح کے وقت پانی میں بھگو کر رات کو پی لو اور رات کے وقت پانی میں بھگو کر صبح پی لو، میں نے عرض کیا یا رسول اللہ ! ﷺ آپ جانتے ہیں کہ ہمارا تعلق کن لوگوں سے ہے اور آپ کو یہ بات بھی معلوم ہے کہ آپ کے پاس کن لوگوں کے درمیان ہم اترے ہیں، یہ بتائیے ! کہ ہمارا ولی کون ہے ؟ نبی ﷺ نے فرمایا اللہ اور اس کا رسول، میں نے عرض کیا یا رسول اللہ ! ﷺ میرے لئے یہ کافی ہے۔