4. حضرت عثمان غنی (رض) کے حالات سے متعلق احادیث

【1】

حضرت عثمان غنی (رض) کے حالات سے متعلق احادیث

حسن بن ابی الحسن کہتے ہیں کہ ایک مرتبہ میں مسجد نبوی میں داخل ہوا، میری نظر اچانک حضرت عثمان غنی (رض) پر پڑی وہ اپنی چادر کا تکیہ بنا کر اس سے ٹیک لگائے ہوئے تھے دو آدمی ان کے پاس سے جھگڑتے ہوئے آئے انہوں نے ان دونوں کے درمیان فیصلہ کردیا پھر میں ان کی خدمت میں حاضر ہوا اور انہیں غور سے دیکھا تو وہ ایک حسین و جمیل آدمی تھے ان کے رخسار پر چیچک کے کچھ نشانات تھے اور بالوں نے ان کے بازوؤں کو ڈھانپ رکھا تھا۔

【2】

حضرت عثمان غنی (رض) کے حالات سے متعلق احادیث

بنانہ کہتی ہیں کہ حضرت عثمان (رض) نے کبھی خضاب نہیں لگایا

【3】

حضرت عثمان غنی (رض) کے حالات سے متعلق احادیث

دیکھنے والے کہتے ہیں کہ حضرت عثمان غنی (رض) نے اپنے دانتوں پر سونے کی تار چڑھا رکھی تھی۔

【4】

حضرت عثمان غنی (رض) کے حالات سے متعلق احادیث

موسیٰ بن طلحہ کہتے ہیں کہ میں نے دیکھا حضرت عثمان غنی (رض) منبر پر تشریف فرما ہیں مؤذن اقامت کہہ رہا ہے اور وہ لوگوں سے ان کے حالات معلوم کر رہے ہیں اور اشیاء کی قیمتوں کے نرخ دریافت فرما رہے ہیں۔

【5】

حضرت عثمان غنی (رض) کے حالات سے متعلق احادیث

سائب بن یزید کہتے ہیں کہ ایک مرتبہ حضرت عثمان غنی (رض) نے سورت ص کی تلاوت کی اور آیت سجدہ پر پہنچ کر سجدہ بھی کیا۔

【6】

حضرت عثمان غنی (رض) کے حالات سے متعلق احادیث

فروخ کہتے ہیں کہ میں نے حضرت عثمان غنی (رض) کے پیچھے عید کی نماز پڑھی ہے اس میں وہ سات اور پانچ تکبیریں کہتے تھے۔

【7】

حضرت عثمان غنی (رض) کے حالات سے متعلق احادیث

خواجہ حسن بصری (رح) نے ایک مرتبہ حضرت عثمان غنی (رض) اور ان کی شدت حیاء کا ذکر کرتے ہوئے فرمایا اگر وہ گھر کے اندر بھی ہوتے تو جب تک دروازہ کو اچھی طرح بند نہ کرلیتے اپنے جسم پر پانی بہانے کے لئے کپڑے نہ اتارتے تھے اور شرم وحیاء ہی انہیں کمر سیدھی کرنے سے مانع ہوتی۔

【8】

حضرت عثمان غنی (رض) کے حالات سے متعلق احادیث

امیہ بن شبل وغیرہ کہتے ہیں کہ حضرت عثمان غنی (رض) بارہ سال تخت خلافت پر متمکن رہے، جن میں سے آخری پانچ سال آزمائش و امتحان کے گذرے۔

【9】

حضرت عثمان غنی (رض) کے حالات سے متعلق احادیث

ابو معشر کہتے ہیں کہ حضرت عثمان غنی (رض) کی شہادت اٹھارہ ذی الحجہ بروز جمعہ ٣٥ ھ میں ہوئی آپ کی کل مدت خلافت بارہ دن کم بارہ سال تھی۔

【10】

حضرت عثمان غنی (رض) کے حالات سے متعلق احادیث

ابوعثمان کہتے ہیں کہ حضرت عثمان غنی (رض) کی شہادت ایام تشریق کے درمیان ہوئی ہے۔ (ایام تشریق کو گذرے ہوئے بہت زیادہ دن نہ ہوئے تھے) ۔

【11】

حضرت عثمان غنی (رض) کے حالات سے متعلق احادیث

قتادہ کہتے ہیں کہ شہادت کے وقت حضرت عثمان غنی (رض) کی عمر ٩٠ یا ٨٨ سال تھی۔

【12】

حضرت عثمان غنی (رض) کے حالات سے متعلق احادیث

ابو العالیہ کہتے ہیں کہ عشرہ ذی الحجہ میں حضرت عثمان غنی (رض) کے گھر کے دروازے پر ہم پہرہ داری کر رہے تھے۔

【13】

حضرت عثمان غنی (رض) کے حالات سے متعلق احادیث

قتادہ کہتے ہیں کہ حضرت عثمان غنی (رض) کی نماز جنازہ حضرت عبداللہ بن زبیر (رض) نے پڑھائی اور انہیں سپردخاک کردیا حضرت عثمان (رض) نے انہی کو یہ وصیت کی تھی۔

【14】

حضرت عثمان غنی (رض) کے حالات سے متعلق احادیث

عبداللہ بن محمد بن عقیل کہتے ہیں کہ ٣٥ ھ میں حضرت عثمان غنی (رض) شہید ہوئے اور پانچ سال آزمائش کے گذرے، جن میں سے چار ماہ حضرت امام حسن (رض) بھی خلیفہ رہے۔

【15】

حضرت عثمان غنی (رض) کے حالات سے متعلق احادیث

ابوالعالیہ کہتے ہیں کہ عشرہ ذی الحجہ میں حضرت عثمان غنی (رض) کے گھر کے دروازے پر ہم پہرہ داری کر رہے تھے۔

【16】

حضرت عثمان غنی (رض) کے حالات سے متعلق احادیث

اسلم کہتے ہیں کہ جس دن موضع الجنائز میں حضرت عثمان غنی (رض) کا محاصرہ کیا گیا، میں اس وقت وہاں موجود تھا، باغی اتنی بڑی تعداد میں تھے کہ اگر کوئی پتھر پھینکا جاتا تو یقینا وہ کسی نہ کسی آدمی کے سر پر ہی گرتا، میں نے دیکھا کہ حضرت عثمان غنی (رض) نے اس بالاخانے سے جو مقام جبرئیل کے قریب تھا جھانک کر نیچے دیکھا اور فرمایا کہ تم میں اے لوگو ! طلحۃ موجود ہیں ؟ لوگ خاموش رہے، تین مرتبہ ایسا ہی ہوا، بالآخر حضرت طلحہ (رض) آگے بڑھ کر سامنے آگئے۔ حضرت عثمان غنی (رض) نے انہیں دیکھ کر فرمایا میرا خیال نہ تھا کہ آپ یہاں موجود ہوں گے، میں یہ سمجھتا تھا کہ ایسا نہیں ہوسکتا کہ آپ کسی گروہ میں موجود ہوں اور تین مرتبہ میری آواز سنیں پھر اس کا جواب نہ دیں طلحہ میں آپ کو اللہ کی قسم دے کر پوچھتا ہوں کہ آپ کو فلاں دن یاد ہے جب آپ اور میں نبی ﷺ کے ساتھ فلاں جگہ تھے، وہاں میرے اور آپ کے علاوہ کوئی صحابی نبی ﷺ کے ساتھ نہ تھے ؟ انہوں نے کہا ہاں مجھے یاد ہے، حضرت عثمان (رض) نے فرمایا اس وقت نبی ﷺ نے آپ سے فرمایا تھا کہ طلحہ ہر نبی کے ساتھ جنت میں اس کی امت میں سے کوئی نہ کوئی رفیق ضرور ہوگا اور یہ عثمان بن عفان جنت میرے رفیق ہوں گے ؟ حضرت طلحہ (رض) نے فرمایا ہاں ! ایسا ہی ہے، پھر حضرت عثمان (رض) واپس چلے گئے۔

【17】

حضرت عثمان غنی (رض) کے حالات سے متعلق احادیث

حمران کہتے ہیں کہ ایک مرتبہ حضرت عثمان (رض) نے ان کی موجودگی میں وضو کے لئے پانی منگوایا، چناچہ کلی کی، ناک میں پانی ڈالا اور تین مرتبہ چہرہ دھویا، پھر راوی نے مکمل حدیث ذکر کی۔

【18】

حضرت عثمان غنی (رض) کے حالات سے متعلق احادیث

حضرت عثمان غنی (رض) نے ایک مرتبہ اپنے پاس موجود حضرات سے فرمایا کیا میں آپ کو نبی ﷺ کی طرح وضو کر کے نہ دکھاؤں ؟ لوگوں نے کہا کیوں نہیں ! چناچہ انہوں نے پانی منگوایا، تین مرتبہ کلی کی، تین مرتبہ ناک میں پانی ڈالا، تین مرتبہ چہرے کو دھویا، تین تین مرتبہ دونوں بازوؤں کو کہنیوں سمیت دھویا، سر اور کانوں کا مسح کیا اور تین مرتبہ پاؤں دھوئے پھر فرمایا کہ نبی ﷺ اسی طرح وضو فرماتے تھے۔

【19】

حضرت عثمان غنی (رض) کے حالات سے متعلق احادیث

ثمامہ بن خزن قشیری کہتے ہیں کہ جس دن حضرت عثمان غنی (رض) شہید ہوئے، میں وہاں موجود تھا، حضرت عثمان غنی (رض) نے ایک مرتبہ اپنے گھر سے جھانک کر دیکھا اور فرمایا اپنے ان دو ساتھیوں کو بلا کر لاؤ جو تمہیں مجھ پر چڑھا لائے ہیں انہیں بلایا گیا حضرت عثمان (رض) نے ان سے فرمایا میں تمہیں اللہ کا واسطہ دے کر پوچھتا ہوں کیا تم جانتے ہو کہ جب نبی ﷺ مدینہ منورہ تشریف لائے اور مسجد نبوی تنگ ہوگئی تو نبی ﷺ نے فرمایا زمین کا یہ ٹکڑا اپنے مال سے خرید کر مسلمانوں کے لئے اسے وقف کون کرے گا ؟ اس کا عوض اسے جنت میں بہترین شکل میں عطاء کیا جائے گا، چناچہ میں خالص اپنے مال سے اسے خریدا اور مسلمانوں کے لئے وقف کردیا اب تم مجھے اس ہی میں دو رکعتیں پڑھنے سے روکتے ہو ؟ پھر فرمایا کہ میں تمہیں اللہ کا واسطہ دے کر پوچھتا ہوں کہ کیا تم جانتے ہو کہ نبی ﷺ جب مدینہ منورہ تشریف لائے تو اس وقت سوائے بیر رومہ کے میٹھے پانی کا کوئی اور کنواں نہ تھا، نبی ﷺ نے فرمایا کون ہے جو اسے خالص اپنے مال سے خریدے اور اپنا حصہ بھی مسلمانوں کے برابر رکھے ؟ اور آخرت میں جنت کے اندر بہترین بدلہ حاصل کرلے ؟ چناچہ میں نے اسے خالص اپنے مال سے خرید کر وقف کردیا اب تم مجھے اس ہی کا پانی پینے سے روکتے ہو ؟ پھر فرمایا کہ کیا تم جانتے ہو کہ میں غزوہ تبوک میں سامان جہاد مہیا کرنے والا ہوں لوگوں نے ان کی تصدیق کی۔

【20】

حضرت عثمان غنی (رض) کے حالات سے متعلق احادیث

شقیق (رح) کہتے ہیں کہ ایک مرتبہ ولید بن عقبہ سے حضرت عبدالرحمن بن عوف (رض) کی ملاقات ہوئی ولید نے کہا کیا بات ہے آپ امیرالمومنین حضرت عثمان (رض) کے ساتھ انصاف نہیں کر رہے ! انہوں نے کہا کہ میری طرف سے انہیں یہ پیغام پہنچا دو پھر راوی نے مکل حدیث ذکر کی۔۔۔۔۔ اور غزوہ بدر سے پیچھے رہ جانے کا جو طعنہ انہوں نے مجھے دیا ہے تو اصل بات یہ ہے کہ میں نبی ﷺ کی صاحبزادی اور اپنی زوجہ حضرت رقیہ (رض) کی تیمارداری میں مصروف تھا، یہاں تک کہ وہ اسی دوران فوت ہوگئیں، جبکہ نبی ﷺ نے شرکاء بدر کے ساتھ مال غنیمت میں میرا حصہ بھی شامل فرمایا : اور یہ سمجھا گیا کہ نبی ﷺ نے جس کا حصہ مقرر فرمایا وہ غزوہ بدر میں شریک تھا۔

【21】

حضرت عثمان غنی (رض) کے حالات سے متعلق احادیث

ابو وائل کہتے ہیں کہ میں نے ایک مرتبہ حضرت عبدالرحمن بن عوف (رض) سے پوچھا کہ آپ لوگوں نے حضرت علی (رض) کو چھوڑ کر حضرت عثمان (رض) کی بیعت کس طرح کرلی ؟ انہوں نے فرمایا اس میں میرا کیا جرم ہے، میں نے تو پہلے حضرت علی (رض) سے کہا تھا کہ میں آپ سے بیعت کرتا ہوں کتاب اللہ، سنت پیغمبر ﷺ اور سیرۃ حضرات شیخین (رض) پر، انہوں نے مجھ سے کہا کہ حسب استطاعت ایسا کرنے کی کوشش کروں گا لیکن جب میں نے حضرت عثمان (رض) کو اس کی پیشکش کی تو انہوں نے اسے قبول کرلیا۔

【22】

حضرت عثمان غنی (رض) کے حالات سے متعلق احادیث

ابو صالح جو حضرت عثمان (رض) کے آزاد کردہ غلام ہیں کہتے ہیں کہ میں نے حضرت عثمان غنی (رض) کو منبر پر دوران خطبہ یہ کہتے ہوئے سنا کہ لوگو ! میں نے اب تک نبی ﷺ سے سنی ہوئی ایک حدیث تم سے بیان نہیں کی تاکہ تم لوگ مجھ سے جدا نہ ہوجاؤ لیکن اب میں مناسب سمجھتا ہوں کہ تم سے بیان کردوں تاکہ ہر آدمی جو مناسب سمجھے اسے اختیار کرلے، میں نے نبی ﷺ کو یہ فرماتے ہوئے سنا ہے کہ اللہ کے راستہ میں ایک دن کی پہرہ داری دوسری جگہوں پر ہزار دن کی پہرہ داری سے بھی افضل ہے۔ حدیث نمبر (٤٤٣) اس دوسری سند سے بھی مروی ہے۔

【23】

حضرت عثمان غنی (رض) کے حالات سے متعلق احادیث

سعید بن مسیب (رح) کہتے ہیں کہ میں نے حضرت عثمان غنی (رض) کو منبر پر خطبہ دیتے ہوئے سنا کہ وہ کہہ رہے تھے میں یہودیوں کے ایک خاندان اور قبیلہ سے جنہیں بنو قینقاع کہا جاتا تھا، کھجوریں خریدتا تھا اور اپنا منافع رکھ کر آگے بیچ دیتا تھا نبی ﷺ کو معلوم ہوا تو فرمایا عثمان ! جب خریدا کرو تو اسے تول لیا کرو اور جب بیچا کرو تو تول کر بیچا کرو۔

【24】

حضرت عثمان غنی (رض) کے حالات سے متعلق احادیث

عبیداللہ بن عدی بن الخیار کہتے ہیں کہ حضرت عثمان غنی (رض) نے ان سے فرمایا اللہ تعالیٰ نے محمد ﷺ کو حق کے ساتھ مبعوث فرمایا : اللہ و رسول کی دعوت پر لبیک کہنے والوں میں، میں بھی تھا، نیز نبی ﷺ کی شریعت پر ایمان لانے والوں میں، میں بھی تھا، پھر میں نے حبشہ کی طرف دونوں مرتبہ ہجرت کی، مجھے نبی ﷺ کی دامادی کا شرف بھی حاصل ہوا اور میں نے نبی ﷺ کے دست حق پرست پر بیعت بھی کی ہے، اللہ کی قسم ! میں نے کبھی ان کی نافرمانی کی اور نہ ہی دھوکہ دیا، یہاں تک کہ اللہ نے انہیں اپنے پاس بلالیا۔